主页 > J生活墙 >【轮证赢家】高槓桿牛博杀27000点街货 >

【轮证赢家】高槓桿牛博杀27000点街货


【轮证赢家】高槓桿牛博杀27000点街货放大图片

噚日拣咗只恒指牛(57457)出嚟,喺朝早11点20分至下半场1点30分,5分钟图见SlowSTC(14,3)落到超卖水平,超卖位向来都係将牛证落场嘅最佳时机,按呢段时间(57457)高低位做过$0.09/$0.084计;但可惜噚日见到大市以慢落嘅姿态下行,喺担心被阴乾同怕一放手就反弹嘅心理挣扎之下,最后选择继续,皆因喺恒指5分钟图上见到下昼2点半打后,条SlowSTC(14,3)由超卖位置慢慢弹返上去,讲紧去到3点20分上到严重超买水平之后一直keep住喺呢个水平横行,唯当时(57457)证价水平同平均买入价差唔多,无打算过夜嘅话,应该係呢个moment就将只(57457)打个和走人;即使过咗夜嘅话,按恒指今朝开市至依家9点56分都係升得嗰几十点就知(57457)最多都只係赚埋个手续费咁大把。

喺大市忽然无方向之下落轮证注就係咁蚀底,但呢啲嘢都唔係你同我可以控制得到;转睇返恒指日线图,噚日都有讲过,恒指已经由上个星期处于保历加通道底部,慢慢爬返上去保历加通道顶部,噚日仲有一段时间升穿过个顶嘅,不过今日就同个顶(26909点)贴住咁滞,至于下方SLowSTC(14,3)两线仍然处于「9」字头以上严重超买水平,连14RSI喺噚日上到「6」字头,今日有继续上升嘅走势,对于RSI嚟讲,呢个水平当然唔属于严重超买啦,只可以话係啱啱踩入咗超买範围。

依家10点3分,恒指升幅比今朝略为扩大至升81点,做紧26930点,高位暂时见26933点,换言之依家恒指係踩入咗熊证最贴价街货区26900至26999点,而呢度有相当于158张期指,比噚日大幅减少咗858张期指,咁都好合理嘅,见到个市开始筑返起一条「上升轨」嘅时候,咁贴价嘅熊证仲留嚟等打靶咩;再上多一层,即27000至27099点呢度就多街货啦,有成相当于712张期指。

至于下方牛证最贴价讲紧都只係26100至26199点,呢度有相当于214张期指,好明显大家都觉得恒指依家处于保历加顶部附近,兼且SlowSTC(14,3)上到严重超买水平係有回落嘅危机,所以先至用一啲咁贴价嘅熊证作调头部署,不过,再谂多一步嘅话就会估大市有理无理,向上杀埋27000点以上嘅重货先算,重货嘛,反正唔好忘记SlowSTC(14,3)係属于敏感度高嘅技指标,係可以超买再超买,而穿保历加通道顶呢啲虽然未至于係家常便饭,但都唔係话好少发生嘅事,穿完上去过两三日就会被条通道包番架啦,无问题架。

今日星期五,最好就梗係Happy Friday啦,恒指牛(59888),收回价26308点,虽然喺一样同收回价嘅牛证当中,佢嘅成交唔算活跃,但成交呢啲都只係剎那光辉嘅事,槓桿反而比较重要,而(59888)就係呢堆牛证当中槓桿最高,有约41.37倍,适合Day Trade用。按一贯策略,见到恒指5分钟图SlowSTC(14,3)回落返去超卖水平先至好入市,依家见恒指升过百点,所以都係要等等。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家



上一篇: 下一篇: